Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının (ASK) Hindistanın ölkəmizdəki səfirliyi ilə birgə keçirdikləri “MAKE İN İNDİA” adlı tədbirdə rəsmi şəxslərlə yanaşı, hər iki ölkədə fəaliyyət göstərən 70-dən çox iş adamı və KİV nümayəndələri iştirak ediblər.Tədbirdə hər iki ölkədə sahibkarlığın mövcud vəziyyəti, investisiya, partnyorluq imkanları barədə təqdimatlar dinlənilib, gələcək əməkdaşlığa dair müzakirələr aparılıbdır.
Salamlama nitqi ilə çıxış edən ASK-nın prezidenti Məmməd Musayev bildirib ki, ölkə prezidenti İlham Əliyevin rəhbərliyi ilə iqtisadiyyatın bütün sahələrində dövlət öz imkanları hesabına müasir sahibkarlıq subyektlərinin formalaşmasına geniş imkan yaradılır, onların öz potensiallarından səmərəli istifadə etmələri üçün əlverişli mühit formalaşdırılır. Ölkə iqtisadiyyatında özəl sektorun üstünlük qazanması, neft hasilatının və gəlirlərinin məqsədyönlü idarə olunması ilə yanaşı, qeyri-neft sahələrinin inkişaf etdirilməsinə xüsusi diqqət yetirilir. Həmçinin iqtisadiyyatımızın inkişafı istiqamətində beynəlxalq əməkdaşlığa xüsusi önəm verilir, yeni investisiya imkanlarının araşdırılması istiqamətində müvafiq iş aparılır. Azərbaycanda sahibkarlığın inkişafına son vaxtlar xüsusi əhəmiyyət verildirini qeyd edən Musayev hal-hazırda ölkəmizdə əlverişli biznes mühitinin formalaşdığını da qonaqların diqqətinə çatdırıb.
ASK-nın prezidenti qeyd edib ki, Azərbaycanla Hindistan iş adamlarını bir araya gətirməkdə əsas məqsəd iki ölkənin biznes sturukturları, ticarət və investisiya sahələrində fəaliyyət və gələcək əməkdaşlıq imkanlarını araşdırmaq məqsədi daşıyır. İki ölkənin iş adamlarının qarşılıqlı fəaliyyətinin rəqabətqabiliyyətli məhsul istehsalına təkan verəcəyinə ümid etdiyini deyən M.Musayev bu tədbirin ölkəmizdə idxal və ixracla bağlı mövcud vəziyyəti canlandıracağına inandığını da dilə gətirib.Hindistanlı iş adamlarını azərbaycanlı həmkarları ilə qarşılıqlı əməkdaşlığa dəvət edib. Bildirib ki, biznes sahəsində əlaqələrin genişləndirilməsi, qarşılıqlı sərmayələrin əldə olunması, müştərək müəssisələrin yaradılması istiqamətdə birgə əməkdaşlıq faydalı ola bilər. Hindistanın informasiya texnologiyaları sahəsində qabaqcıl ölkə olduğunu deyən M.Musayev bu sahədə əməkdaşlıq imkanlarını dəyərləndirməyi iş adamlarına tövsiyyə edib.
Hindistanın Azərbaycandakı səfiri Sanjay Rana çıxış edərək bu cür tədbirin təşkilinə görə Azərbaycan Sahibkarlar Konfederasiyasına öz minnətdarlığını edib. Səfir belə görüşlərin gələcək əlaqələrin inkişafına müsbət təsir edəcəyini bildirib.
Tədbir Hindistan Səfirliyinin İkinci Katibi və Ticarət Departamentinin başçısı cənab Norbu Neginin “MAKE İN İNDİA” mövzusunda təqdimatı ilə davam edib. Təqdimatda Hindistanın iqtisadiyyatı barədə tədbir iştirakçılarına ətraflı məlumat verilib.
“ASK Biznes Konsaltinq” MMC-nin direktor müavini Nurlan Quliyevin “Azərbaycanda İnvestisiya İmkanları” mövzusunda təqdimatı da hindistanlı iş adamları tərəfindən maraqla qarşılanıb.