Azərbaycan Respublikası Sahibkarlar (İşəgötürənlər) Təşkilatları Milli Konfederasiyasında “CPC” MMC-nin “Oğuz Qarğıdalı Emalı Məhsulları Kompleksi”nin təqdimat mərasimi keçirilib. Təqdimatda ölkəmizdə fəaliyyət göstərən müxtəlif şirkətlərin nümayəndələri iştirak ediblər.
Təqdbirdə maraqlı təqdimatla çıxış edən müəssisənin Baş direktoru Vaqif Hüseynov məlumat verib ki, ən müasir texnoloji avadanlıqlarla təchiz olunmaqla və yeni istehsal sahələri hesabına əhəmiyyətli şəkildə genişləndirilməklə 2015-ci ilin sonlarından başlayaraq yenidən fəaliyyətə başlamış “Oğuz Qarğıdalı Emalı Məhsulları Kompleksi” ölkənin şirniyyat, konditer, konserv və süd məhsulları, dondurma və s. istehsalı müəssisələrinin qarğıdalının emalından əldə olunan şəkər əvəzedicilərinə – qlükoza, fruktoza, quru nişasta, maltoza və s. olan tələbatlarını ən yüksək keyfiyyət standartları səviyyəsində ödəmək məqsədilə yaradılmışdır.
Qeyd edilib ki, kompleks hal-hazırda gündə 80 ton qarğıdalı emal edərək ya 58 ton qlükoza; ya 63-68 ton fruktoza; ya 58 ton maltoza ; ya da 52 ton quru nişasta istehsal etmək gücünə malikdir. Bu isə, orta hesabla ildə 23 min ton şəkər əvəzediciləri olmaq etibarilə istər daxili tələbatın ödənilməsi, istərsə də məhsulların müəyyən qisminin ixracı üçün yetərli hesab olunur. Kompleksin yeni istehsal korpusları elə layihələndirilib ki, gələcəkdə istehsal gücü müəyyən investisiyalar hesabına 300 ton /gündə/ qarğıdalı emalınadək artırıla biləcəkdir. Bununla da müəssisənin gündəlik məhsul istehsalı həcmi orta hesabla 63 tondan 250 ton müxtəlif çeşidli məhsulların, o cümlədən 100 ton Fruktoza, 72,5 ton qlükoza və 77,5 ton quru nişasta istehsalınadək artacaqdır.
“CPC” MMC-nin “Oğuz Qarğıdalı Emalı Məhsulları Kompleksi”nin fəaliyyəti tədbir iştirakçıların böyük marağına səbəb olub. Daha sonra iştirakçıları maraqlandıran suallar ətrafında fikir mübadiləsi aparılıb.